حليمة طبيعة لمريم البسام: “انا بحترم قرارك ومسيرتك ..بس فضيوا المطارح يا مديرة”
*كتبت الزميلة في “الجديد” حليمة طبيعة مودعة الزميلة مريم البسام:*
اليوم بتفل مريم البسام من الجديد وبتترك وراها فراغ كبير..
فراغ مهني وفراغ عاطفي..
مريم البسام ما كانت فقط مديرة أخبار وبرامج سياسية..
كانت إم وأخت وسند ورفيقة وصديقة لكل مراسل ومذيع ومهندس وتقني وفني وعامل بهالمؤسسة من كبيرن لصغيرن..
كانت هي لي تدافع عن حقوق الكل وما تسكت عالظلم..
جيت عالجديد بالـ ٢٠١٥.. ما كنت اتفق ابدا مع مريم.. نقار ونقير.. الكيميا وقتا يمكن ما ركبت..
فليت سنتين.. ورجعت ومريم اول مين احتضنّي.. وضلت ورح تبقى..
مريم هي لي بتقول للمراسل يلا نزال عالارض انا بساعدك بموضوعك.. وبتكفيه..
هي لي بتصلّح ورا الكلّ..
هي لي ما بتغيب لو غابت باجازة بتشتغل..
بتذكر مريم كنت صغيرة وعم احضر عالتلفزيون.. طالعة من المستشفى مولدة واخدينها عالتحقيق.. حتى بهالنهار ما عطلت..
وهي لي لو دوامها مأخر والأمر بيستدعي تجي، بتجي لو عز الفجر..
هي لي بتعرف كيف تشدّ وكيف ترخي بالوقت المناسب..
بتعرفولكن مدير بابو ما بيتسكر؟ إيه هيدي مريم.. بابها ولا بعمره تسكّر بوج موظف..
منفوت منتسلى معها.. منتغدا منتعشا ومنفتح مواضيع ما بتخلص حتى لو شخصية..
اي وهي لي بتناقش معها بالدراما والمسلسلات والأغاني الحلوة..
هي لي بتحب فيروز وجوليا والأصوات الحلوة.. وعندا ذاكرة أرشيف الرحابنة يمكن شخصيا ما عندن ياه..
مريم هوية.. عملت حالة بالمقدمات الاخبارية.. وما حدا عرف يقلدها..
اليوم بتفل مريم وبيتسكر هالباب..
ومين رح يفيقني الصبح يقلي يلا فيقي انا بكتب مقدمة وعناوين جداد وانت حضري الاخبار؟
ومين رح يركض يعملي ترويقة لانو حرارتي ٣٩ ولازم اكل مع انو نفسي مسدودة؟..
ومين رح يركض ورايي عالمستشفى لما اتعوّر؟
ومين رح يعرف شو يعني لأ.. وشو يعني إيه.. لما قولن؟
أنا شخصيا الفقد كبير كتير عندي.. والحزن أكبر بكتير ع غيابك يا مديرة..
أنا بحترم قرارك ومسيرتك.. بس فضيوا المطارح يا مديرة 💔
بحبك كتير
